चैत ३० चितवन । पूर्वी चितवनमा आईचर ट्रक र ट्याङकर एकआपसमा ठोक्किदा पाँच जना घाइते भएका छन् ।
पूर्वी चितवनको खैरहनीमा आज दिउँसो करिब साढे ११ बजे आइचर ट्रक र डिजेल बोकेको ट्यांकर आपसमा ठोक्किदा पाँच जना घाइते भएका हुन् । खैरहनी नगरपालिका वडा नम्बर ९ बैरेनीचोकस्थित साईबाबा पेट्रोल पम्प अगाडि विरगंजबाट टाँडीतर्फ आइरहेको लु १ ख ६४१८ नम्बरको ट्यांकर र विपरित दिशाबाट जाँदै गरेको ना १ ख ३४३२ नम्बरको ट्रक आपसमा ठोक्किएका हुन् ।दुर्घटना हुनासाथ प्रहरी निरीक्षकको कमाण्डमा टोली खटीएको थियो ।
ठक्करबाट ट्रक चालक भरतपुर महानगरपालिका–१२ बस्ने ५० वर्षीय गजेन्द्र कुमार गम्भिर घाइते भएका छन् ।उनको खुट्टामा चोट लागेको छ ।आईचरमा सवार रोल्पा जिल्ला रुन्चीगढी गाउँपालिका १ बस्ने वर्ष २२ का नवराज परियार सामान्य घाइते भएका छन् । उनको निधार र खुट्टामा चोट लागेको छ । दाङ राजपुर गाउँपालिका ६ बस्ने वर्ष २८ वर्षीय जित बहादुर बुढाको हात र खुट्टामा चोट लागेको छ ।रोल्पा रुन्चीगढी गाउँपालिका ९ बस्ने बर्ष १९ का प्रकाश कामीको खुट्टा र अनुहारमा चोट लागेको छ । उनको अवस्था मध्यम भएको प्रहरीले जारी गरेको सुचनामा उल्लेख गरिएको छ । यस्तै ट्याङकर चालक रुपन्देही बुटवल उपमहानगरपालिका १६ का ३६ वर्षीय मनोहर दगुरिया थारुलाई पनि सामान्य चोट लागेको छ ।
घाइतेहरुको पुरानो मेडिकल कलेजमा उपचार भइरहेको जिल्ला प्रहरी कार्यालय चितवनका प्रवक्ता नरहरी अधिकारीले जानकारी दिए ।
