चैत ११ काठमाडौं। काठमाडौंमा आफ्नै श्रीमतीको हत्या अभियोगमा प्रहरीले एक युवकलाई पक्राउ गरेको छ।
काठमाडौं प्रहरी परिसरका प्रवक्ता एसपी दिनेशराज मैनालीले दिएको जानकारीअनुसार धारिलो हतियार हानेर श्रीमतीको हत्या गर्ने उदयपुर कटारी घर भई हाल काठमाडौंको बूढानीलकण्ठ–१३ स्थित चुनिखेलमा बस्ने २१ वर्षीय भक्त बहादुर थापालाई नियन्त्रणमा लिइएको हो। बिहीबार राति घरायसी विवादका क्रममा पत्नी २४ वर्षीया लक्ष्मी तामाङ (थापा) लाई मासु काट्न प्रयोग हुने दाउले घाँटीमा हानेर गम्भीर घाइते बनाई भागेको भन्ने सूचना आएपछि महानगरीय प्रहरी प्रभाग बूढानीलकण्ठबाट खटिएको टोली घटनास्थल पुगेको थियो। घाइते लक्ष्मीलाई तत्काल चुनिखेलमै रहेको करुणा अस्पतालमा पुर्याइए पनि उपचारका क्रममा त्यही राति ११:४० बजे चिकित्सकले मृत घोषणा गरेको एसपी मैनालीले जानकारी दिए।
फरार भक्तबहादुरलाई महानगरीय प्रहरी प्रभाग बूढानीलकण्ठको हिरासतमा राखी घटनाबारे थप अनुसन्धान भइरहेको प्रहरीले जानकारी दिएको छ।
