चितवन, १५ जेठ । वर्तमान नेपालको सामाजिक–राजनीतिक परिवेश निराशामय छ। भ्रष्टाचार, बेरोजगारी, मूल्यवृद्धि, र राजनीतिक अस्थिरताको निरन्तर प्रभावले आम नागरिक विशेषगरी युवावर्गमा देशप्रतिको विश्वास खस्किएको छ। ‘देश बस्नै मन लाग्दैन’, ‘यहाँ केही हुँदैन’, ‘अब भविष्य अन्धकार छ’ भन्ने भनाइहरू जनमानसमा गुञ्जिरहँदा एक फरक आवाज सार्वजनिक भएको छ— ‘जाग अब नेपाली’।
यो नयाँ गीतले केवल नेपाली समाजको यथार्थ तस्वीर प्रस्तुत गरेको छैन, बरु युवालाई आशा, भरोसा र परिवर्तनको लागि उभिन आग्रह समेत गरेको छ। गायक तथा संगीतकार प्रशान्त मिस्टले गाएको यो हिपहप शैलीको गीत नेपाली संगीत क्षेत्रमा ताजगी झल्काउने प्रयास हो। उनको शब्द, संगीत र स्वरमा उतारिएको यो सिर्जना केवल मनोरञ्जन होइन, चेतनाको आह्वान हो।
सांगीतिक विद्रोहको स्वर-
‘जाग अब नेपाली’ गीत प्रशान्त मिस्टको पाँचौं एल्बम ‘मेरो देश नेपाल’ अन्तर्गत समावेश गरिएको हो। एल्बमले देशभक्ति र सामाजिक चेतनाको सन्देशलाई केन्द्रमा राखेको छ। प्रशान्त भन्छन्, “यो गीत युवालाई जाग्ने, सोच्ने र बोलेर परिवर्तनको प्रक्रिया अगाडि बढाउने हौसला दिन्छ। यो गीत जाँगरको हो, जसले निराशालाई ऊर्जा बनाउँछ।”
गीतको शब्दहरूमा देशप्रेम छ, सामाजिक यथार्थ छ र भविष्यको सपना पनि। लडाइँ, झगडा, आन्दोलनले थिलथिलो भएको समाजमा अब समभाव, एकता र सकारात्मक सोचको खाँचो छ भन्ने भावना गीतको मूल सन्देश हो।
भिडियोको कलात्मकता-
गीतको म्युजिक भिडियो हालै सार्वजनिक भएको छ। शैलेन्द्र खोकालीले यस भिडियोको छायांकन, सम्पादन र निर्देशन गरेका छन्। भिडियोलाई यथार्थपरक दृश्य, युवा जोश र सांगीतिक ऊर्जा सँगै प्रस्तुत गरिएको छ। आधुनिक दृश्यशैली र हिपहपको गतिको संयोजनले भिडियो प्रभावशाली बनाएको छ।
युवा पुस्तालाई सन्देश
देश छाड्ने लहर, निराशा र थकाइबीच ‘जाग अब नेपाली’ गीतले युवालाई भिन्न बाटो देखाएको छ। यो गीत केवल संगीत नभएर आन्दोलन हो—आशाको आन्दोलन, चेतनाको आन्दोलन र सामाजिक एकताको आन्दोलन। जब सम्पूर्ण वातावरण निराशाले ढाकिएको छ, त्यति बेला एउटा गीतले आशाको झिल्को दिन सक्नु आफैँमा महत्वपूर्ण हुन्छ। ‘जाग अब नेपाली’ त्यो झिल्को हो—जो सुन्दा मात्र होइन, बुझ्दा झन् प्रेरणादायी लाग्छ।
–00–
