काठमाडौं, २६ बैशाख । पाकिस्तानले भारतीय सैन्य अड्डाहरूमा आक्रमण गरेको भारतीय रक्षा मन्त्रालयले जनाएको छ। जम्मू, पठानकोट र उधमपुरमा रहेका सैन्य अड्डाहरूमा गरिएको आक्रमणलाई भारतको वायु रक्षा प्रणालीले सफलतापूर्वक रोक्न सफल भएको र कुनै पनि जनधनको क्षति नभएको रक्षा मन्त्रालयले जनाएको छ। भारतले आफ्नो सार्वभौमसत्ता र नागरिकहरूको सुरक्षा सुनिश्चित गर्न प्रतिबद्ध रहेको जनाएको छ।
पाकिस्तानका रक्षामन्त्री ख्वाजा आसिफले उक्त आक्रमणको जिम्मेवारी अस्वीकार गर्दै भनेका छन्, “हामीले हालसम्म कुनै आक्रमण गरेका छैनौँ। जब पाकिस्तानले आक्रमण गर्छ, सबैलाई थाहा हुनेछ।” उनले बीबीसीसँगको कुराकानीमा थपे, “यी आरोपहरू भारतको आक्रमणलाई औचित्यपूर्ण बनाउनका लागि लगाइएका हुन्।”
यो घटनापछि, भारतले पाकिस्तानमा रहेका आतंकवादी प्रशिक्षण केन्द्रहरूमा हवाई आक्रमण गरेको र पाकिस्तानले २५ वटा भारतीय ड्रोनलाई अवरोध गरेको दाबी गरेको छ। पाकिस्तानका अनुसार, भारतीय हवाई आक्रमणमा ३१ नागरिकको मृत्यु भएको र ५ वटा भारतीय जेटलाई खसालिएको जनाएको छ।
अन्तर्राष्ट्रिय समुदायले दुवै देशलाई शान्ति र संवादको माध्यमबाट समस्या समाधान गर्न आह्वान गरेको छ। अमेरिकी विदेशमन्त्री मार्को रुबियोले दुवै पक्षलाई तनाव कम गर्न र वार्ता सुरु गर्न आग्रह गरेका छन्। –000–
