काठमाडौं । झापाको भद्रपुर विमानस्थलमा अवतरणका क्रममा रन–वेबाट चिप्लिएर बुद्ध एयरको विमान दुर्घटनामा परेको छ । दुर्घटनामा परेको विमानमा सवार सबै यात्रु सकुशल रहेका छन् ।
९एन–एमएफ कलसाइन भएको एटीआर–७२ विमान अवतरण गर्ने क्रममा धावनमार्गबाट चिप्लिएर दुर्घटनामा परेको हो । नेपाल नागरिक उड्डयन प्राधिकरणका प्रवक्ता ज्ञानेन्द्र भुलका अनुसार विमानमा ५१ जना यात्रु सवार थिए । सबै यात्रुलाई सुरक्षित रूपमा उद्धार गरी विमानबाहिर निकालिएको उनले जानकारी दिए ।
बुद्ध एयरका प्रवक्ता दिपेन्द्र कर्णका अनुसार अवतरणका क्रममा जहाज धावनमार्गबाट चिप्लिएको हो । घटनाको प्राविधिक कारण पत्ता लगाउन प्राविधिकसहितको टोली काठमाडौंबाट आजै भद्रपुर पठाउने तयारी भइरहेको पनि उनले बताए ।
दुर्घटनापछि भद्रपुर विमानस्थलमा केही समय उडान–अवतरण प्रभावित भएको छ ।–00–
