🌧️ आज देशका केही भूभागमा वर्षाको सम्भावना

काठमाडौं । देशका विभिन्न स्थानमा आज वर्षा हुने सम्भावना रहेको जल तथा मौसम विज्ञान विभागले जनाएको छ ।

विभागका अनुसार दिउँसो देशको पहाडी भूभागमा सामान्यतया बदली रहनेछ भने बाँकी क्षेत्रमा आंशिक बदली हुनेछ । कोसी, वाग्मती र गण्डकी प्रदेशका पहाडी भूभागका केही स्थानमा, लुम्बिनी र कर्णाली प्रदेशका पहाडी भूभागका थोरै स्थानमा तथा बाँकी भूभागका एक–दुई स्थानमा मेघगर्जन र चट्याङसहित मध्यम वर्षा हुने देखिएको छ ।

यसैगरी, कोसी र वाग्मती प्रदेशका पहाडी भूभागका एक–दुई स्थानमा भारी वर्षा हुने सम्भावनासमेत रहेको विभागले जनाएको छ ।

रातिको समयमा देशको पहाडी भूभागमा आंशिक बदली रहनेछ भने अन्य भूभागमा मौसम मुख्यतः सफा रहने अनुमान गरिएको छ । तर, कोसी, वाग्मती र गण्डकी प्रदेशका पहाडी भूभागका केही स्थानमा मध्यम वर्षा हुन सक्ने प्रक्षेपण गरिएको छ ।

हाल देशभर मनसुनी वायुको प्रभाव कमजोर रही स्थानीय वायुको आंशिक प्रभाव मात्र रहेको विभागले स्पष्ट पारेको छ ।