बागमतीको छैठौं मुख्यमन्त्री बने इन्द्रबहादुर बानियाँ

हेटौंडा, २० साउन | बागमती प्रदेशको छैठौं मुख्यमन्त्रीमा नेपाली कांग्रेसका इन्द्रबहादुर बानियाँ नियुक्त भएका छन्। नेपाली कांग्रेस र नेकपा एमाले को संयुक्त समर्थनमा मुख्यमन्त्री बनेका बानियाँलाई प्रदेश प्रमुख दीपकप्रसाद देवकोटाले आज नियुक्त गरेका हुन्।

बानियाँले ११० सदस्यीय प्रदेशसभामध्ये कांग्रेसका ३७ र एमालेका २७ गरी ६४ सांसदको समर्थनसहित सरकार गठनको दाबी पेश गरेका थिए। बहुमतको लागि आवश्यक ५६ भन्दा बढी समर्थन सांसद पाउँदा बानियाँ संविधानको धारा १६८(२) अनुसार मुख्यमन्त्री बन्न सफल भएका हुन्।

मकवानपुर निवासी बानियाँ यसअघि प्रदेशसभाका नेता र पूर्वसंघीय राज्यमन्त्री भइसकेका अनुभवी नेता हुन्। उनी मकवानपुरबाट मुख्यमन्त्री बन्ने दोस्रो व्यक्ति हुन्। संविधानसभा निर्वाचन २०७० मा प्रत्यक्ष निर्वाचित भएका बानियाँ मकवानपुरको कम्युनिस्ट वर्चस्व तोड्दै जित्ने पहिलो कांग्रेस नेता समेत हुन्।

बानियाँ यसअघि संघीय सरकारमा गृह तथा संस्कृति पर्यटन राज्यमन्त्रीसमेत भइसकेका छन्। २०७३ सालमा पर्यटन मन्त्रालय कांग्रेसबाट राप्रपामा सरेपछि उनलाई गृहमन्त्रालयको जिम्मेवारी दिइएको थियो।

२०७४ सालपछि प्रदेशसभामा प्रवेश गरेका बानियाँले पहिलो कार्यकालमै मुख्यमन्त्री बन्ने प्रयास गरेका थिए, तर सफल भएनन्। तर साढे दुई वर्षपछि उनले बहादुर सिंह लामालाई पराजित गर्दै कांग्रेस संसदीय दलको नेता बन्न सफल भए।

गत ९ साउनमा लामाविरुद्ध २१ सांसदको नेतृत्वमा अविश्वास प्रस्ताव दर्ता गरिएपछि, १३ साउनमा प्रस्तावमाथिको मतदानमा २२ मत समर्थनमा परेपछि लामा नेता पदबाट बाहिरिए। १४ साउनमा भएको पुनः निर्वाचनमा बानियाँले विजय हासिल गरेपछि मुख्यमन्त्री बन्ने बाटो खुलेको हो।

कांग्रेस–एमाले सहमति अनुसार नेतृत्व हस्तान्तरण हुने

बागमती प्रदेशमा एक वर्षअघि सरकार गठन हुँदा कांग्रेस–एमालेबीच २०–२० महिनाको नेतृत्व सहमति भएको थियो। त्यसअनुसार, बानियाँले करिब ८ महिना सरकारको नेतृत्व गरी आगामी फागुनमा नेकपा एमालेलाई सत्ता हस्तान्तरण गर्ने तयारी रहेको स्रोतले जनाएको छ।