चितवन, ११ माघ । गैँडा मारी तीन वर्षदेखि फरार रहेका राप्ती नगरपालिका वडा नं–६ का टीकाराम बोहोरा (खेसरबहादुर) पक्राउ परेका छन् ।
विशेष सूचनाका आधारमा नेपाली सेनाको विशेष टोली, चितवन राष्ट्रिय निकुञ्ज कार्यालय र निकुञ्जको सुरक्षार्थ खटिएको खड्गबहादुर दल गणको संयुक्त टोलीले निजलाई माघ ९ गते दिउँसो १ः५० बजे हेटौँडा उपमहानगरपालिका वडा नं–२ चौकीटोलबाट पक्राउ गरेको हो ।
चितवन राष्ट्रिय निकुञ्ज कार्यालयका संरक्षण अधिकृत गणेशप्रसाद तिवारीका अनुसार २०७६ भदौ ३१ गते नवलपरासीको अमलटारीमा भाले गैँडा मारी खाग काटेर लगेको र २०७७ कात्तिक २० गते २ बजे आइल्याण्ड क्षेत्रमा गोली हानी खाग काटेर लगेको घटनाको अनुसन्धानका क्रममा २४ जना प्रतिवादीको संलग्नता खुलेको थियो । जसमध्ये बोहोेरा तीन वर्षदेखि फरार सूचीमा रहेका थिए ।
निज बोहोरालाई बुधबार नै बयान तथा थुनछेक आदेशको लागि चितवन जिल्ला अदालतमा पेश गरिएको संरक्षण अधिकृत गणेशप्रसाद तिवारीले जानकारी दिए ।–00–
