चैत १० सोलुखुम्बु । सोलुखुम्बुबाट श्रीमतीको हत्या गरेको आरोपमा प्रहरीले एक युवकलाई पक्राउ गरेको छ।
नेचा सल्यान गाउँपालिका–२ की २५ वर्षीया लिलामाया राईको हत्या आरोपमा प्रहरीले उनका पति ३५ वर्षीय गुणराज राईलाई पक्राउ गरेको हो।मंगलबार साँझ खाना खाएर पतिपत्नी सँगै सुतेका थिए। लिलामाया बुधवार बिहान मृत भेटिएपछि उनका पतिलाई पक्राउ गरिएको जिल्ला प्रहरी कार्यालय सोलुखुम्बुका प्रमुख प्रहरी नायब उपरीक्षक कवित कटवालले जानकारी दिए।
श्रीमतीको मृत्यु भएको आफूले बिहान मात्र थाहा पाएको दाबी गुणराजले गरेका छन्। बिहान पत्नी मृत फेला परेको भन्दै गुणराजले छिमेकीलाई खबर गरेका थिए।मृतकको शरीरमा चोटपटक रहेकाले घटना शंकास्पद देखिएको स्थानीयबासीले बताएका छन्।
प्रहरीले पनि लीलामायाको हत्या भएको आशंका गरेको छ। शव पोष्टमार्टमका लागि जिल्ला अस्पताल फाप्लुमा राखिएको छ। घटनाबारे थप अनुसन्धान सुरु गरिएको प्रहरीले जनाएको छ।
घरायसी विवादमा गुणराजले पत्नीको हत्या गरेको आशंका स्थानीयले गरेका छन्।
