काठमाडौं २ जेठ । जलवायु परिवर्तनको प्रभावबारे अन्तरराष्ट्रिय समुदायलाई जानकारी गराउने र समाधानका उपाय खोज्ने उद्देश्यसहित सरकारले पहिलोपटक आयोजना गरेको ‘सगरमाथा संवाद’ आजदेखि काठमाडौंमा सुरु हुँदैछ। संवादको मुख्य नारा ‘जलवायु परिवर्तन, पर्वत र मानवताको भविष्य’ तय गरिएको छ।
संवाद कार्यक्रम यही जेठ ४ गतेसम्म सञ्चालन हुनेछ।
परराष्ट्रमन्त्री तथा संवाद व्यवस्थापन समितिका संयोजक डा. आरजु राणा देउवाका अनुसार, सम्मेलनमा एक सय ७५ विदेशी पाहुनासहित करिब त्यत्तिकै सङ्ख्यामा नेपाली प्रतिनिधि सहभागी हुनेछन्। १२ देशका उच्च तहका प्रतिनिधिमण्डल सहभागी हुने कार्यक्रम रहेको छ। चीन, भारतलगायत देशका विशिष्ट पाहुना नेपाल आइपुगेका छन् भने अन्य मुलुकका अतिथिहरू आउने क्रम जारी छ।
📽️ उद्घाटनमा श्रव्यदृश्य प्रस्तुति
कार्यक्रमको उद्घाटनमा संवादसम्बन्धी चिनारीयुक्त श्रव्यदृश्य सामग्री प्रस्तुत गरिनेछ। भारत र चीनका विशिष्ट पाहुना तथा कोप–२९ का अध्यक्ष र अजरबैजानका राष्ट्रपतिको जलवायु सम्बन्धी प्रतिनिधिले उद्घाटन सत्रमा सम्बोधन गर्ने कार्यक्रम छ।
संयुक्त राष्ट्रसङ्घका महासचिव एन्टोनियो गुटेरेसद्वारा पठाइएको सन्देश पनि श्रव्यदृश्य माध्यमबाट प्रस्तुत गरिनेछ।
उद्घाटन सत्रपछि ‘प्लेनरी सेसन’ आयोजना हुनेछ, जसमा सहभागी सबै राष्ट्र तथा अन्तरराष्ट्रिय र क्षेत्रीय सङ्गठनहरूले प्रस्तुति दिनेछन्।
🧭 समानान्तर सत्र र साइड इभेन्ट
आजैदेखि विभिन्न विषयगत समानान्तर सत्रहरू सुरु हुनेछन्। सबै सत्रहरू शनिबार साँझ ४ः३० बजेभित्र सम्पन्न हुने कार्यक्रम रहेको छ। कार्यक्रममा राजनीतिज्ञ, नीति निर्माता, विज्ञ, विषयज्ञ, विद्वान र अनुसन्धानकर्ताहरूको सहभागिता रहनेछ।
🏔️ हिमाली उडान र ‘काठमाडौँ घोषणा’
तेस्रो तथा अन्तिम दिन, विदेशी पाहुनाका लागि हिमाली दृश्यावलोकन गर्ने पर्वतीय उडानको व्यवस्था गरिएको छ। कार्यक्रमको समापनमा ‘काठमाडौँ घोषणा’ जारी गरिने छ। संवादमा सार्क, बिम्स्टेक, विश्व बैंक, एसियाली विकास बैंक, विभिन्न विश्वविद्यालय, अनुसन्धान केन्द्र, नागरिक समाज, NGO/INGO लगायतका ६१ स्वदेशी तथा विदेशी संस्थाको सहभागिता रहेको छ।
🔹 व्यवस्थापन समितिको संरचना
कार्यक्रमको सफल आयोजनाका लागि प्रधानमन्त्री केपी शर्मा ओलीको संयोजकत्वमा निर्देशक समिति, परराष्ट्रमन्त्री डा. आरजु राणा देउवाको संयोजकत्वमा व्यवस्थापन समिति तथा वन तथा वातावरणमन्त्री ऐनबहादुर शाही ठकुरीको सहसंयोजकत्वमा समिति गठन गरिएको हो।
सचिवालयको संयोजक प्रधानमन्त्री तथा मन्त्रिपरिषद्को कार्यालयका सचिव राजकुमार श्रेष्ठ रहेका छन् भने सदस्यसचिव वन मन्त्रालयका सहसचिव डा. महेश्वर ढकाल रहेका छन्।
🌐 सगरमाथा संवाद : साझा हित र सामूहिक कल्याणको मञ्च
‘सगरमाथा संवाद’ एक बहुसरोकारवाला अन्तरराष्ट्रिय मञ्च हो, जुन जलवायु परिवर्तनलगायत विश्वव्यापी, क्षेत्रीय र राष्ट्रिय महत्त्वका मुद्दाहरूमा गहन छलफल र समाधान खोज्न समर्पित छ। सगरमाथाको नामबाट नामकरण गरिएको यस संवादको उद्देश्य मानवताको साझा हित र सामूहिक कल्याण प्रवर्द्धन गर्नु हो।
सरकारले हरेक दुई वर्षमा संवादको आयोजना गर्ने निर्णय यसअघि नै गरिसकेको छ।
