काठमाडौं — अस्ट्रेलियाको भिक्टोरिया राज्यको ग्रामीण क्षेत्र स्टोनली मा भएको सवारी दुर्घटनामा एकै परिवारका तीन नेपालीको मृत्यु भएको छ। मृत्यु हुनेहरू चितवन घर भएका आमा, बाबु र छोरा रहेका छन्, जबकि हजुरआमा भने गम्भीर घाइते भए पनि जीवित रहेकी छन्।
दुर्घटनामा ४१ वर्षीय पुरुष, ३१ वर्षीया महिला र तीन वर्षीय बालकको घटनास्थलमै मृत्यु भएको प्रहरीले पुष्टि गरेको छ। उनीहरूसँगै यात्रा गरिरहेकी वृद्धा—मृतक महिलाकी आमा—लाई हेलिकोप्टरमार्फत उद्धार गरी अस्पताल लगिएको थियो। अहिले उनको अवस्था स्थिर र खतरामुक्त रहेको जनाइएको छ।
घटना सब वे बाट मेन रोडमा निस्कने क्रममा मालबाहक ट्रकले ठक्कर दिँदा भएको बताइएको छ। सो दुर्घटनापछि ट्रक चालक सामान्य घाइते भएका छन्।
दुर्घटनाको समयमा परिवारका अन्य सदस्य अर्को कारमा सवार थिए र उनीहरूले केहीबेरपछि मात्र घटनाबारे जानकारी पाएका थिए।
भिक्टोरियाका वाणिज्य दूत निराजन गौलीले एकै परिवारका तीन सदस्यको निधनले नेपाली समुदायमा गहिरो पीडा पुगेको बताएका छन्। उनले घाइते महिलाको उपचार भइरहेको र उनको अवस्था सुधारोन्मुख रहेको जानकारी दिए।
त्यसैगरी, एनआरएन भिक्टोरियाका संयोजक महादेव धानुकले पीडित परिवारसँग निरन्तर सम्पर्कमा रहेको र आवश्यक सहयोगका लागि तयारी अवस्थामा रहेको बताएका छन्।–00–
