चितवन, ४ असार । माडी नगरपालिकाले वातावरण प्रदूषण नियन्त्रण गर्न प्लास्टिकजन्य सामग्री प्रयोगमा प्रतिबन्ध लगाएको छ। नगरपालिकाको ४३औं कार्यपालिका बैठकले उक्त निर्णय गरेको हो।
नगर प्रमुख प्रशासकीय अधिकृत जगतप्रसाद भुसालका अनुसार प्लास्टिकजन्य वस्तुहरूले वातावरणसँगै मानव स्वास्थ्यमा समेत प्रतिकूल असर पारेका कारण रोक लगाउने निर्णय गरिएको हो। उहाँले भन्नुभयो, “प्लास्टिकजन्य वस्तु रोक लगाउँदा वातावरण स्वच्छ र हराभरा देखिन्छ।” उद्योग वाणिज्य संघ माडी शाखाको सहकार्यमा यो निर्णय कार्यान्वयनमा ल्याइएको हो। भुसालले बताएअनुसार, “यस क्षेत्रमा प्लास्टिकजन्य वस्तुको प्रयोग अत्यधिक भएकाले प्रतिबन्ध लगाउनु आवश्यक थियो।”
बैठकको निर्णयपछि समुदायमा सचेतना अभियान, आकस्मिक अनुगमन लगायतका कार्यक्रम सुरु गरिएको छ। नगरपालिकाले प्लास्टिकका झोला, गिलास, कपलगायतका सामग्रीमा प्रतिबन्ध लगाएको जानकारी दिइएको छ। भुसालले भने, “प्लास्टिकको गिलासमा चिया वितरण र अन्य प्लास्टिकजन्य प्रयोगले फोहोर व्यवस्थापनमा समस्या सिर्जना भएकाले यसको नियन्त्रण अपरिहार्य भएको हो।”
यसैबीच, नगरपालिकाका उपप्रमुख खेमप्रसाद महतोले माडीलाई ‘प्लास्टिकमुक्त नगरपालिका’ घोषणा गर्ने तयारी भइरहेको जानकारी दिनुभयो। चितवन राष्ट्रिय निकुञ्जको मध्यवर्ती क्षेत्रमा पर्ने माडीमा प्लास्टिकजन्य वस्तुले वन्यजन्तु र मानव स्वास्थ्यमा असर पारेको भन्दै यस्तो निर्णय गर्नुपरेको उहाँले बताउनुभयो।
प्लास्टिकजन्य वस्तुले जमिनको उर्वरा शक्ति घटाउनुका साथै स्थानीय इकोसिस्टममा समेत प्रतिकूल प्रभाव पार्न थालेकाले नियन्त्रण आवश्यक भएको नगरपालिकाले जनाएको छ। अहिले नगर क्षेत्रमा संयुक्त अनुगमनसहित प्लास्टिक नियन्त्रण अभियान तीव्र पारिएको छ।
