काठमाण्डौं, २६ जेठ । भिजिट भिसा प्रकरणमा गृहमन्त्री रमेश लेखकको राजीनामा र छानबिन समिति गठनको माग गर्दै विपक्षी दलहरूले जारी राखेको अवरोधका कारण आज पनि प्रतिनिधि सभा बैठक बस्ने नबस्ने अन्योल कायम छ। प्रतिनिधि सभाको बैठक आज दिउँसो २ बजेका लागि बोलाइएको छ।
बैठकअघि विपक्षी दलहरूबीच थप रणनीति बनाउन अहिले छलफल भइरहेको छ। विपक्षी गठबन्धनले गृहमन्त्रीले राजीनामा नदिए पनि छानबिन समिति गठन गर्ने प्रतिबद्धतासहित सदनमा आउने हो भने बोल्न दिने सक्ने संकेत गरेका छन्। तर, सत्तापक्षको अडान भने स्पष्ट छ — ‘न गृहमन्त्रीको राजीनामा हुन्छ, न छानबिन समिति बनाइन्छ।’
सहमति खोज्ने प्रयासस्वरूप प्रमुख प्रतिपक्षी नेपाली कांग्रेसले विपक्षी दलहरूसँग आन्तरिक छलफल तीव्र बनाएको छ। कांग्रेसका उपसभापति पूर्णबहादुर खड्काको नेतृत्वमा रास्वपासँग यसअघि पनि बेग्लै छलफल भएको थियो।
आज पनि विपक्षी दलहरूको बैठकपछि कांग्रेससँग पुनः छलफल हुने कार्यवाहक अध्यक्ष डिपी अर्यालले जानकारी दिएका छन्। कांग्रेससँग हुने छलफलमा रास्वपाबाट उपसभापति डा. स्वर्णिम वाग्ले, शिशिर खनाल र सन्तोष परियार सहभागी हुनेछन्।
यद्यपि, दुवै पक्षका नेताहरूले वार्ताको माहोल सकारात्मक बन्दै गएको दाबी गरेका छन्। अवरोध अन्त्यका लागि प्रधानमन्त्री पुष्पकमल दाहाल ‘प्रचण्ड’ ले शनिबार कांग्रेस सभापति शेरबहादुर देउवासँग छुट्टै छलफल गरेका थिए, तर सहमति भने जुट्न सकेको छैन।
