काठमाडौं, २७ असार । नेकपा एकता राष्ट्रिय अभियानका अध्यक्ष बामदेव गौतम नेतृत्वको अभियान नेकपा (एकीकृत समाजवादी) पार्टीमा समाहित हुने भएको छ । साउन २ गते काठमाडौंस्थित राष्ट्रिय सभागृहमा विशेष समारोह आयोजना गरी दुई पार्टीबीचको एकता औपचारिक रूपमा घोषणा गरिने भएको छ ।
यस एकता सम्बन्धी लिखित सहमतिमा नेकपा (एकीकृत समाजवादी)का अध्यक्ष माधव कुमार नेपाल र एकता राष्ट्रिय अभियानका अध्यक्ष बामदेव गौतमले हस्ताक्षर गरेका छन् ।
सहमति पत्रमा दुबै पार्टीको राजनीतिक सिद्धान्त मिल्ने, विचार, नीति र मार्गदर्शन एउटै भएको जनाइएको छ । त्यस्तै, नेपालको कम्युनिष्ट आन्दोलनलाई अझ सशक्त र एकीकृत बनाउनु आजको ऐतिहासिक आवश्यकता भएको उल्लेख गर्दै एकताको निर्णय लिइएको उल्लेख छ ।
पूर्व उपप्रधानमन्त्रीसमेत रहेका बामदेव गौतमले नेकपा माओवादी, एमाले हुँदै पछिल्लो समय नेकपा विभाजनपछिको विभिन्न यात्रामा रहेर ‘एकता अभियान’ थालेका थिए । अब उक्त अभियान माधव नेपाल नेतृत्वको समाजवादी पार्टीमा समाहित भएपछि पार्टीको आन्तरिक शक्ति सन्तुलन र रणनीतिमा नयाँ मोड आउने अनुमान गरिएको छ ।
