चैत्र ९ मकवानपुर । मकवानपुरको मनहरीबाट लागूऔषध गाँजासहित ४ जना पक्राउ परेका छन् । मनहरी गाउँपालिका वडा नम्वर–६ स्थित पूर्वपश्चिम राजमार्ग अन्तर्गतको सडक खण्डमा मनहरीबाट चितवनतर्फ जाँदै गरेको ना ६ ख ४४०९ नम्बरको ट्रकबाट ४२ किलो लागूऔषध गाँजा बरामद गरिएको जिल्ला प्रहरी कार्यालय मकवानपुरले जनाएको छ ।
गएराति ८ बजेको समयमा विशेष सूचनाको आधारमा इलाका प्रहरी कार्यालय मनहरीबाट खटिएको प्रहरी टोलिले सो ट्रकबाट उक्त परिमाणको लागूऔषध गाँजा बरामद गर्नुको साथै एक महिलासहित ३ पुरुषलाई पक्राउ गरिएको जिल्ला प्रहरी कार्यालय मकवानपुरका प्रहरी नायव उपरीक्षक जयश्वर रिमालले जानकारी दिए ।
पक्राउ पर्नेमा उक्त ट्रकका चालक मनहरी–६ बस्ने वर्ष ३१ को इश्वर पाठक, सहचालक हेटौंडा उपमहानगरपालिका वडा नम्बर–११ बस्ने वर्ष २२ को सागर थिङ, सोही ट्रकमा सवार नवलपरासी रामग्राम नगरपालिका वडा नम्बर–१२ बस्ने वर्ष ६० को राजेशप्रसाद रौनियार र सोही स्थान बस्ने वर्ष ४० की रेश्मा भर रहेको प्रहरी नायव उपरीक्षक रिमालले बताए । प्रहरीले उक्त लागूऔषध गाँजा, ट्रक र ती व्यक्तिहरुलाई नियन्त्रणमा लिएर थप अनुसन्धान गरिरहेको छ ।
